रौतहटमा ग्यास बोकेको ट्यांकर दुर्घटना, आगलागीको जोखिम

रौतहट- पूर्व–पश्चिम राजमार्गअन्तर्गत रौतहटको चन्द्रनिगाहपुर धन्सार खण्डमा LPG ग्यास बोकेको ट्यांकर दुर्घटनामा परेको छ।

दुर्घटना राजमार्गको बीच सडकमै भएकाले सवारी आवागमन पूर्णरूपमा अवरुद्ध भएको छ।

प्रहरीका अनुसार दुर्घटनापछि ट्यांकरबाट ग्यास लिक भइरहेको छ, जसका कारण आगो लाग्ने वा विस्फोट हुन सक्ने उच्च जोखिम रहेको छ। ग्यास लिक भइरहेकाले अवस्था संवेदनशील बन्दै गएको र कुनै पनि सानो लापरवाहीले ठूलो दुर्घटना निम्त्याउन सक्ने प्रहरीले जनाएको छ।

दुर्घटनापछि नेपाल प्रहरी, ट्राफिक प्रहरी र सुरक्षाकर्मीको टोली घटनास्थलमा परिचालन गरिएको छ।

सुरक्षा कारण देखाउँदै प्रहरीले उक्त सडक खण्ड तथा आसपासको जंगल क्षेत्रमा नजान सर्वसाधारणलाई कडा अनुरोध गरेको छ। साथै सवारी चालकलाई वैकल्पिक मार्ग प्रयोग गर्नसमेत आग्रह गरिएको छ।

ग्याँस लिक नियन्त्रणमा लिन र ट्यांकर सुरक्षित रूपमा हटाउन सम्बन्धित निकायसँग समन्वय भइरहेको र प्रहरीले सर्वसाधारणलाई भिडभाड नगर्न, घटनास्थलबाट टाढा रहन र सुरक्षाकर्मीको निर्देशन पालना गर्न आग्रह गरेको छ।।